Қазақстанда қырылған киік саны 85 мыңға жетті деп хабарлады бүгін Астанада арнайы брифинг өткізген ауыл шаруашылығы министрлігі өкілдері.
Ауыл шаруашылығы вице-министрі Ерлан Нысанбаевтың айтуынша, киіктер Қостанай, Ақмола, Ақтөбе облыстарында және Бетпақдалада қырылып жатыр. Киік өлекселерін жинап, жою, өртеу жұмыстарына төтенше жағдай қызметкерлері мен қорғаныс министрлігі сарбаздары жұмылдырылып жатыр. Киік қырылған аймақтар қоршауға алынған, енді карантин жарияланбақ.
Брифингке қатысқан министрлік өкілдері киіктердің алдын-ала болжам бойынша жұқпалы пастереллез дертінен қырылғанын айтады. Министрлік қазір Ақтөбе облысы аумағында киіктердің қырылуы тоқтауға таяғанын, киіктердің қырылу орындары солтүстіккке қарай ойысып бара жатқанын айтады.
Қазақстан үкімет соңғы жылдары саны күрт азайған киіктерді аулауға 2021 жылға дейін тыйым салған болатын. Соңғы ресми есеп бойынша, қырылғанға дейінгі киік саны 256 мыңды құраған. Қазақ тілінде жүнінің түсіне қарай жазда - киік, қыста - ақбөкен аталатын (орысша - сайга, ағылшынша Saiga antelope - ред.) дала жануары негізінен Қазақстанды, Ресейдің Қалмақиясын және Моңғолияны мекендейді.
Азаттық.орг
