"Жар-жар" әнінің тарихы
"Жар-жар" әнінің авторы ұмыт болғандықтан, ол ел аузында халық әні делінеді. Алайда, дәстүрлі той әнінің әуені халықтікі болғанмен, оның сөздерін белгілі ақын Әбдірахман Асылбек жазған.
Жамбыл облысы, Талас ауданының тумасы Әбдірахман Асылбек достарымен бірге арман қуып, Алматыға оқуға келеді. Қаладағы Қазақ педагогикалық институтының, тарих-филология факультетінде оқып жүрген кезде жерлесі Берден Байқошқаров (Ауылшаруашылық институтының студенті) отау құрғалы жатқанын айтып, оған тойға шақыру қағазын беріп кетеді. Той қарсаңында бір ауылдан түлеп ұшқан достар бас қосып, тойға тартатын сый-кәде туралы ақылдасады. Танымал "Жар-жар" әнінің сөзін жаңаша жазып, тойда шырқау туралы ой келеді. Ақынның қаламға жақындығы бар екенін білетін достары оған «әнге жаңадан сөз жаз» деп қолқа салады. Бұл 1959 жылдың күз мезгілінде болған еді.
