Ерінді бояу – тек далап жағу ғана емес, ол да өзіндік бір өнер. Дұрыс боялмаған ерін сізді сұрпайы көрсетіп, көзіңізге жаққан макияжды, ол қанша әдемі болса да, мәнін кетіреді.
Ерінді бояу бірнеше кезеңнен тұрады.
1) Ерінді бояуды ең алдымен тональды крем жағудан бастау керек. Крем далаптың ерінде ұзақ тұруына ықпал етеді. Кремнің бір тамшысын ерінге жағып, қылшықпен бірыңғай жағыңыз. Егер ерніңізді біршама үлкейткіңіз келсе, ерніңіздің сол жеріне кремді асырып жағыңыз;
2) Одан кейін далап ұзақ тұруы үшін әрі ерінді үлкейту үшін ерін шетімен қарындашпен сызық жүргізу керек. Ерін сыртына асырып жаққан тональды кремнің үстіңгі жағын сызу керек. Сызықты ерін ұштарынан ортасына қарай бағытта жүргізу керек. Қарындаш түсі далап түсімен сәйкес болуы керек. Қарындашты далап үстінен басқа түсті екендігін көрсетіп тұрып жағатындар бар! Бұл жеңілтек қыздардың кейпін беріп, өте сұрықсыз көрінеді, сондықтан сіздің жаққан қарындашыңыздың түсі далап түсімен бірдей болып, білінбей тұруы керек, ал егер сіз далап емес, ерінге арналған жылтырды ғана қолдансаңыз, қарындаш түсі ерін түсімен бірдей болу керек;
3) Одан кейін далапты жағамыз;
4) Далапты жаққан соң, оны сулықпен бір сүртіп аламыз. Ерінде тек далаптың реңкі қалғандай көрінуі керек.
5) Одан кейін опа жағамыз. Опа ерінге барқыт нәзіктік кейіп береді. ақындар жырлайтын нағыз алқызыл нәзік ерінге соның көмегімен жетуге болады. Сонымен қатар, опа еріндегі далап қандай анық, жылтыр түсті болса да, сіздің ерніңіздің жаратылысы өзі сондай секілді ой тудырады. Ерінге опаны аз ғана сеуіп, саусағыңызбен түртіп қана жағыңыз.
6) Содан кейін далаптан тағы бір қабат жағамыз.
7) Енді жылтыр жағу кезегі де жетті. Жылтырды тек астыңғы ерінге ғана жағу жеткілікті. Оны негізінен астыңғы еріннің орта тұсына жаққан дұрыс, бұл сізге нәзікті, биязылық кейіп береді.
