Ағылшынның экспрессионист суретшісі Фрэнсис Бэконның триптихы Christie's аукционында рекордтық сома 142 млн АҚШ долларына сатылды, деп хабарлайды kazakh-tv.kz.
«Люсьен Фрейдтің үш этюды» деп аталатын картина Нью-Йоркте өткен бәссаудада небәрі 6 минутта иесін тапты. Туындыны сатып алушының есімі құпия сақталуда. 1969 жылы салынған картинада Бэконның досы британдық суретші Люсьен Фрейд бейнеленген. Бұл – суретші қылқаламынан туған ең жарқын туындылардың бірі. Бұған дейін әлемдегі ең қымбат өнер туындысы норвегиялық суретші Эдвард Мунктың «Айқай» атты шығармасы саналып келген болатын. Ол өткен жылы Sotheby's аукционында 120 миллион долларға сатылған.
