Жәйрем полиметалл кені , Қарағанды облысы Қаражал қаласынан солтүстік-батысқа қарай 60 км жерде. Кен орны 1951 жылы ашылып, 1964 жылдан барланған. Кен Жайылма грабен-синклиналінің ортасында пайда болған екінші дәрежелі брахиантиклинальбойында орналасқан. Кентас жоғарғы девонның фамен ғасырының флишоид қабатында шоғырланған. Кен орны Шығыс, Батыс, Қиыр батыс деп аталатын 3 телімге бөлінген. Кен денелері – сыйыстырушы жыныстарға сәйкес жатқан линза және қабат пішінді күрделі денелер. Ұзындығы 200 – 1600 м, ені 100 – 700 м, қалыңдығы 1 м-ден 115 м-ге дейін. Кентастардың қорғасынды-мырышты, таза баритті, мырышты-олигонитті, тотыққан қорғасынды-мырышты түрлері бар. Негізгі минералдары – галенит, сфалерит, мельниковит,олигонит, барит, пирит.
