Қазақстан Республикасының "Мемлекеттік құқықтық статистика
және арнайы есепке алу туралы" Заңына түсініктеме
Биылғы жылдың 22 желтоқсанында Қазақстан Республикасының Президенті "Мемлекеттік құқықтық статистика және арнайы есепке алу туралы" Заңға қол қойды, бұл Заң жарияланғанынан бастап 10 күн өткеннен кейін қолданысқа енеді.
Еліміздің құқықтық статистикалық жүйесін дамыту үшін осы Занның ерекше маңыздылығына байланысты оның жасалу тарихына қысқаша тоқталу орынды.
Заңның қабылдануына дейін бұл сала заңдық реттелуден тыс болған және тек ведомстволық нормативтік нұсқаулық актілермен регламенттелген, сондықтан оны дайындаудың қажеттілігі Республика Үкіметінің 2000 жылғы 31 қазандағы қаулысымен бекітілген 2000-2002 жылдарға арналған Қазақстан Республикасындағы қылмыспен күрес Бағдарламасында қаралған.
Заң жобасын қараудың бастапқы кезеңінде оның ережелерін "Мемлекеттік статистика туралы" Заңды қайталау арқылы жасау туралы пікір бар еді.
Дегенмен аталған Заңды зерттеу және оны құқықтық статистика және арнайы есепке алу ерекшеліктерімен салыстыру осы позицияның қателігін көрсетті, себебі "Мемлекеттік статистика туралы" Заң құқықтық саланы регламенттемей-ақ экономикалық, әлеуметтік, демографиялық және экологиялық салалардың құбылыстары мен процестерін қамтиды.
Заң жобасын дайындауда Конституция, сондай-ақ барлық қолданыстағы нормативтік құқықтық актілер пайдаланылған.
Жоба барлық мемлекеттік мүдделі органдармен терең және жан-жақты талқылаудан өтті, Үкімет мүшелерінің, сондай-ақ еліміздің Парламентінің екі палатасының да қолдауына ие болды.
"Мемлекеттік құқықтық статистика және арнайы есепке алу туралы" Заңда бекітілген ережелерді қарай отырып, оның тек тұжырымдамалық ерекшеліктеріне тоқтала кетуді жөн көрдік.
Оңда қамтылған нормалар құқықтық статистика және арнайы есепке алу саласында пайдаланылатын арнайы терминологияны нақты айқындауға бағытталған.
Атап айтқанда, осы заң жобасының ережелерімен "мемлекеттік құқықтық статистика", "ведомстволық есеп" түсініктері айқындалады, құқықтық статистика және арнайы есепке алу субъектілері анықталған, мәліметтері статистикалық ақпараттың объектісі болып табылатын жеке және заңды тұлғалар құқықтарының кепілдіктері қаралған.
