Уағалейкум әссәләм, Арман! «Ғашықтық», «махаббат» деген нәрселер адам табиғатындағы бар дүниелер. Махаббат көңіл және сезім мәселесі. Тіпті, Құран Кәрімде: «وَجَعَلَ بَيْنَكُمْ مَوَدَّةً وَرَحْمَةً – Алла сендердің араларыңа сүйіспеншілік пен мейірімділік салып қойды»[1], - дей келе ерлі-зайыптылардың арасындағы махаббат пен мейірімділікті анық білдірген. Және мейрімділіксіз махаббаттың болмайтындығын да аталмыш аяттан түсінуге болады. (Аяттың арапша мәтініндегі «Жәъалә» етістігі – жарату, беру, орнықтыру, салып қою деген мағыналарда қолданылады).
Ендігі жерде, «ғашықтар күнін» атап өтсін дейтін шариғат үкімі бар ма деп тұрсаңыз, ондай күнді атап өтсін деген шариғат бұйрығы жоқ.
Ал, қоғамға «Қозы көрпеш-Баян сұлу ғашықтар күнін» атап өтуді дәстүрге айналдыру керек пе деп сұраған болсаңыз, айтарымыз оған да қажеті жоқ деген пікірдеміз. Неге десеңіз, біріншіден - «ғашықтықты» насихаттауға адамдар мұқтаж емес. Екіншіден – «Қозы көрпеш-Баян сұлу» лироэпостық жырында екі ғашықтың арасындағы болған махаббаттың немен аяқталғаны бәріне белгілі. Сондықтан, ондай нәрселерді көптеп насихаттау – жастар арасында махаббат жолында құрбан болушылықты, дәлірек айтқанда «суицидты» арттыра ма деген қауіп те жоқ емес. Үшіншіден - ғашықтар күнін желеулетіп көптеген жастар түрлі ауыр күнәларға баратыны да жасырын емес. Және бұл соңғы жылдары еліміздегі жастар арасында атап өтілуі әдетке айналып бара жатқан "Валентин" күніне еліктеушілік болып табылады. Ең дұрысы – Аллаға мәлім!
